Joriy yilning 15 noyabr kunidan 15 dekabr kuniga qadar Respublikamiz miqyosida “Yong‘in xavfsizligi oyligi” o‘tkazilmoqda. Farg‘ona shahar Favqulodda vaziyatlar bo‘limi xodimlari tomonidan muntazam ravishda shaxar xududida joylashgan korxona va tashkilotlarda, ijtimoiy soxa obektlarida, fuqarolarning yashash uylarida, talabalar turarjoylarida, qurilish obektlarida favqulodda vaziyatlarni olidini olish, yong‘in xavfsizligini ta’minlan ayniqsa is gazidan zaxarlanishni oldini olish bo‘yicha profilaktik tadbirlar o‘tkazilmoqda. Kuz-qish mavsumida is gazidan zaxarlanish kabi noxush xolatlar kuzatilmoqda. Fuqarolardan is gazidan zaxarlanishni oldini olish uchun quydagilarga amal qilish tavsiya etiladi:
Is gazi – yonuvchi modda va materiallarning (gaz, yog‘och, ko‘mir kabilar) chala yonishi natijasida hosil bo‘ladigan rangsiz va hidsiz gaz hamda zaharli modda hisoblanadi.
Is gazining ajralishi nostandart va nosoz gaz asboblaridan hamda isitish pechlaridan foydalanish, talabga javob bermaydigan dudbo‘ronlarni o‘rnatish yoki ularni noto‘g‘ri o‘rnatish, mavjudlarini o‘z vaqtida tozalamaslik, gazning yetarli miqdorda havo bilan aralashmasligi kabilar tufayli sodir bo‘ladi.
Is gazi vujudga kelishi sabablariga yo‘l qo‘ymaslik va undan zaharlanmaslik uchun bir qator ehtiyot choralarini ko‘rish tavsiya etiladi:
Gaz va muqobil yoqilg‘i (ko‘mir, o‘tin va boshqa) turlaridan foydalanishda xavfsizlik qoidalariga qat’iy rioya etish;
Nostandart (qo‘lbola yasalgan) yoki sertifikatga ega bo‘lmagan isitish pechlari va anjomlaridan foydalanmaslik;
Isitish pechlarining dudbo‘ronlarini toza va soz holatda bo‘lishini ta’minlash;
Gaz yoki boshqa muqobil yoqilg‘iga moslashtirilgan isitish pechlari hamda suyultirilgan uglevodorod gaz ballonlari (anjomlari)ni dam olish (uxlash) xonalariga olib kirmaslik;
Oshxonada o‘rnatilgan tabiiy gazda ishlovchi gaz plitalardan xonalarni isitish maqsadida foydalanmaslik;
Havo almashmaydigan xonalarni isitishda ochiq olov (ko‘mir va o‘tin cho‘g‘lari)dan foydalanmaslik;
Havoni almashtiruvchi shamollatish shaxtalari yoki tuynuklarni ochiq va ishchi holatda bo‘lishini ta’minlash;
Xonadonlarga is gazini aniqlovchi qurilma o‘rnatish tavsiya qilinadi. Zero, qurilmani sotib olish va o‘rnatish xarajatlari oila a’zolari, ayniqsa yosh bolalarning hayotidan qimmatga tushmasligi aniq.
Gaz ballonlarini isiqlik manbaiga yaqin joyda qoldirmaslik lozim. Agarda binoda gaz hidi sezilsa, oyna va eshiklarni zudlik bilan ochish, ko‘chaga chiqish va 104 raqami orqali gaz xo‘jaligi avariya xizmati yoki 1050 raqami bo‘yicha qutqaruv xizmatiga qo‘ng‘iroq qilish kerak. Bunday holatlarda chiroq, olov yoqish, elektr uskunalarini ishga tushirish taqiqlanadi.
Farg‘ona shahar FVB PNB inspektori kapitan B.Komilov